امیر جماعت اسلامی کراچی حافظ نعیم الرحمان نے بلدیاتی الیکشن فوج کی نگرانی میں کرانے کا مطالبہ کر دیا۔
کراچی میں ادارہ نور حق میں پریس کانفرنس کرتے ہوئے حافظ نعیم الرحمان کا کہنا تھا کراچی میں 15 جنوری کو بلدیاتی انتخابات ہونے جا رہےہیں لیکن حکومت کی پوری کوشش ہے کہ انتخابات ملتوی کرائے جائیں۔
انکا کہنا تھا ایم کیو ایم کا کندھا استعمال کرکے پیپلزپارٹی بلدیاتی الیکشن سے فرار کا راستہ اختیار کر رہی ہے لیکن ہم ایسا ہونے نہیں دیں گے، صوبائی وزیر ناصر حسین شاہ نے یقین دہانی کرائی ہے کہ الیکشن وقت پر ہوں گے، کراچی کے حالات کی پیپلز پارٹی اور ایم کیو ایم دونوں ہی شریک جرم ہیں، شہر کی بربادی میں سب کچھ ان ہی کا کیا دھرا ہے۔
حافظ نعیم الرحمان نے بلدیاتی انتخابات فوج کی نگرانی میں کرانے کا مطالبہ کرتے ہوئے کہا کہ شہر میں بدامنی کے خاتمے کے لیے رینجرز کو اختیارات دیے جائیں، بلدیاتی انتخابات 120 دن میں کرانا لازمی ہے لیکن ڈیڑھ سال کا وقت گزر گیا۔
