چیف آف آرمی سٹاف عاصم منیر نے دورہ خضدار کے موقع پر بلوچستان کو غیر مستحکم کرنے کی کوششوں کو ناکام بنانے کے لیے بہترین آپریشنل تیاری پر زور دیا۔
پاک فوج کے شعبہ تعلقات عامہ کے مطابق چیف آف آرمی اسٹاف جنرل سید عاصم منیر نے بلوچستان کے علاقوں خضدار اور بسیمہ کا دورہ کیا، اس موقع پر آرمی چیف کو سیکیورٹی کی موجودہ صورتحال اور فارمیشن کی آپریشنل تیاریوں پر بریفنگ دی گئی اور پرامن اور محفوظ ماحول یقینی بنانے کے لیے اٹھائے جانے والے اقدامات سے آگاہ کیا گیا۔
آرمی چیف جنرل سید عاصم منیر کے بلوچستان پہنچنے پر کور کمانڈر کوئٹہ لیفٹیننٹ جنرل آصف غفور نے پرتپاک استقبال کیا۔ جنرل سید عاصم منیر نے فوجیوں کے ساتھ بات چیت کرتے ہوئے بلوچستان کو غیر مستحکم کرنے کی کوششوں کو ناکام بنانے کے لیے بہترین آپریشنل تیاری پر زور دیا۔
آئی ایس پی آر کے مطابق بیرونی دشمنوں کے بلوچستان میں پرامن ماحول کو خراب کرنے کے مذموم عزائم سے آگاہ ہیں، اسی لیے صوبے میں فوج کی تعیناتی اور آپریشنز پر توجہ مرکوز کی جا رہی ہے ، بلوچستان میں سماجی و اقتصادی ترقی کے لیے سازگار ماحول فراہم کریں گے۔
